تقرير عن فيلم Highway 2014

حياتنا طريق سريع .. Highway
*********************
من اكتر الافلام اللى ترددت قبل كتابه تقريرها .. لانه من الافلام اللى يأما خدت تقرير ايجابى اوى يأما سلبى اوى .. المشاهد يأما قال الفيلم يستاهل 10/10 يأما 0/10 .. وبالتالى هحاول اكون حياديه مع فيلم انا اديته من قبل كدة 10/10 .. واقف فى ال safe side واكون حياديه على قدر الامكان ..

القصه :
فتاة ثريه تتعرض للأختطاف قبل فرحها بأيام .. لتكتشف ان حريتها مبعثره على طريق سريع ..

بطولة:
عاليا بهات : فيرا
رانديب هودا: مهابير

الاداء:

عاليا بهات : معقوله دى البنت المدللة اللى شفناها فى Student Of The Year شخصياً مكنتش بحبها .. بس لو كملت اختيارتها بالشكل دة .. هتبقي من النجمات الاوائل وهتصنف مع فيديا بالان ورانى موخيرجى وبريانكا تشوبرا .. كنجمات افلام العيار التقيل .. دورها للفتاه الثريه المدللة اللى فى نفس الوقت مغلوبه على امرها .. اللى بتتعرض للأذى الجنسي من اهلها جوا البيت كان رائع .. صرخاتها والمها وصلنى .. دموعها دبحتنى .. حسيت بمعانتها .. اسيره جوا بيتها وطليقه وقت اسرها .. صراع نفسي رهيب داير جوا شخصيتها ...

حبيت ادائها اوى لما بدأت تتقبل الوضع وتكلم نفسها وتقول انا مبسوطه .. بس انا مخطوفه ... هو انا بكلم نفسى .. انا اتجننت .. كانت تحفه   .. برائتها ووقاحتها .. واختيارها للدور كان مناسب جداً .. لو قامت بالدور دة فنانه سنها اكبر من سنه عاليا مكنتش تقبلته بنفس الكيفيه ..

مشهدها وهى بتواجه اهلها فى النهايه ... وبتسيبهم وتمشى وتنادى على مهابير فى السما .. خلى جسمى يقشعر .. الشخص الوحيد اللى اداها الامان والحب .. حتى دة راح !!!  

اديها لادائها 4/5

رانديب هودا : يخربيته   .. ايه الجبروت دة .. الراجل دة اسطوره السيناريو بتاعه .. مكملتش نص صفحه .. ومع ذلك ادائه كان جبار .. ادائه الصامت الرابض قوى الجأش .. والصارم القاسى .. كان خطير .. معاناته الدفينه والمه .. ضحكته اللى فيرا قدرت تسرقها منه .. خلتنى اتنطط من الفرحه  .. رانديب من النجوم المبدعين اللى منالوش نصيب كبير فى سينما بوليوود للأسف .. ملامحه وهو بيسمعلها وهى بتحكى مأساتها .. وتأثره .. ويعمل عبيط اول ما تبصله .. وفى النهايه يحضنها .. ايه الجمال دة .. !!!! ومكنش بيتكلم .. اقوى الادوار والادائات هى اللى تقدمها بدون ما تحتاج كلام .. فالكلام اضعف اللغات اللى بيستخدمها الانسان

ادائه يستحق 4.9/5

تحليل :
- بداية الفيلم عاديه .. عروسه زهقت من البيت والاحتفالات وبتقرر تخرج مع عريسها (كيس الجوافه ) والادب ميسمحليش اقول اكتر من كدة .. بس هسيبكم توصفوا انتوا خطيبها فى الكومنتات براحتكم  .. وبتتخطف منه .. وهو مبيتكلمش .. البدايه عاديه .. بس بيشدك الحدث .. هيحصل ايه بعد كدة .. فى تطور غير منتظر بقى .. وتصاعد رائع

- تطور اداء عاليا بهات .. من رافضه للوضع لمصدومه لخانعه .. ومن ثم عاشقه للوضع .. على الطريق السريع لقت حريتها .. لقت نفسها .. لقت الحمايه من شخص هو حتى ميعرفهاش ..

- وبنكتشف بعد كدة ان داخل حياة فيرا وجع ونقص كبير .. وكمان داخل حياة الخاطف مهابير .. اللى بيكملوا بعض .. فى قصة حب من نوع غريب .. مش اتنين هيتجوزوزا لالالا .. مش عاشق وعاشقه وسارى ابيض على الجبال .. انما شافوا بعض ازاى .. شافت فيه الاب .. الحمايه .. الصديق .. الرفيق .. وهو شاف فيها ايه .. شافها امه .. شافها بنته .. شافها اخته .. جمعهم حب من نوع خاص .. من نوع راقى ..

- احداث الفيلم كلها بتدور على طريق سريع .. وبعض المناظر الطبيعيه الخلابه كعادة بوليوود ... بس المرادى بدون الوان وبدون بهرجه .. هى بس الطبيعه .. انا فين وانت فين .. احنا مين .. حياتنا هى طريق سريع .. واحنا بنمر من فوق .. هنلحق نلاقى انفسنا .. طيب هنلحق نعرف احنا مين او عايزين حتى ايه .. !!! اسئله محتاجه تأمل

- نهاية الفيلم مكنتش متوقعاها .. بس كمان مكنتش عارفه هيخلص ازاى .. اصل هما مش هيتجوزوا .. وهى مش هترجع لاهلها .. طيب وبعدين .. !! .. حقيقى نهايه وجعتنى بس مناسبه لحقيقه واحده بس فى حياتنا .. وهى ان الاشخاص اللى بنتعلق بيهم وبيغيرونا لازم يمشوا  ..

- حبيت قرارها فى النهايه وهى بتسيب البيت وبتعيش فى الجبال .. وتتأمل طفولتها .. وبتلاقى نفسها .. 

- فى مشاهد فى الفيلم محتاجه بورتيريهات :
مشهدها وهى بتحكيله عن مآساتها مع عمها ..
ومشهد وهو بيحضنها بعد كدة ..
ومشهد لما بيبقى نايم على رجلها ويقوم مفزوع وهى تتبطبطب عليه فى حنان امومى عجيب ..
ومشهد وهما فى الكوخ وهى نايمه فى حضنه .. كلها مشاهد مليانه مشاعر لمستنى جداً ..
ومشهد النهايه وهى بتتكلم مع اهلها ..
ومشهدها وهى بتبص للسماء فى نظرة وداع ..

- سيناريو الفيلم قصة تانيه محتاجه اننا نقف عندها .. سبق وقولتلكم انى بعشق الفيلم اللى السيناريو بتاعوا محترم .. علق معايا كلام كتير زى ما بتقوله :
" يجب ان نعيش فى وسطهم ونحبهم ونصادقهم ونحمى انفسنا منهم .. الوحوش "
" المكان الذى اخذتنى منه لا اريد العوده اليه والمكان الذى سنذهب اليه لا اريد الوصول اليه .. فقط لنبقى على هذا الطريق "
" الحياه محيره لا نعرف كيف نميز بين الصدق والحقيقه "
"على الفتاه ان تظل دائما حذره .. ولكن نسيتم ان تقولوا لى انها يجب ان تكون حذره ايضاً داخل المنزل "
يخربيت الروعه  

- طبعا الموسيقى حوار تانى .. الموسيقى للمبدع اى ار رحمان ... يعنى الرقى والجمال والنعومه .. الموسيقه متعه فى حد ذاتها .. سيمفونيه ماشيه معانا طول الفيلم .. والاغانى رائعه .. مابين الرتم السريع المفرح .. والدرامى الحزين .. والحنون .. اتأثرت بكل اغنيه فى الفيلم والموسيقى لمست اعماقى لابعد حد ..

- الفيلم طبعاً من كتابة واخراج العظييييييم Imtiaz Ali الراجل دة مفترى ولا يقل اهميه عن كاران جوهر وطبعاً هو مخرج افلام كتير زى Jab We Met RockStar Movie Cocktail (2012 film) .. وحقيقى كان عبقرى فى كل مشهد قدمه لينا واخرجه لينا بشكل متكامل

سلبيات :
عشان ارضى ضميرى لازم اكتب سلبيات .. 
- يمكن الرتم البطئ للفيلم يكون سلبيه للبعض ... فى حين ان انا شخصيا مش بحب الافلام السريعه .. فا دى بتبقى ازواق .. شخصيا بحب الرتم البطئ عشان اتمتع بكل حدث .. انما الفيلم المحشى والسريع .. بشعر انى اتخطفت وملحقتش افهم الدنيا ماشيه ازاى ...

الفيلم من النوع الدرامى .. لا فى مشاهد رومانسيه ولا بطله بسارى بيهفهف بين الخرفان .. ولا ممثل بيجرى ويشيلها ويلف بيها .. الفيلم بيتكلم عننا .. من الافلام النفسيه القليله فى بوليوود .. ويمكن فكرنى بـ Talaash - The Answer Lies Within وفكرنى بأفلام عامر النفسيه .. ودة سبب ان الناس اختلفت عليه .. الفيلم مش اى حد يشوفه يتبسط بيه .. لانه محتاج عمق .. فلسفه .. تأمل ..  

الفيلم صالح للمشاهده العائليه ..
تقييمى له 4.5/5

ياريت ياريت ياريت تشوفوه ولا تفوتوه .. لانه من اروع الافلام فى 2014
واتوقع انه يحصد جوايز كتير اوى ..

• غرد
• شاركه
• شاركه
• شاركه
• شاركه

عن الكاتب Ahmed Mido

هذا النص فقط ، يعكس وجهه نظر كاتبه . ولا يعكس وجهه نظر المدونه او مؤلفيها ، مع تحيات مدونة تقارير بوليود

مقالات قد تهمك