يارب .. اين انت ؟! ... PK The Film
الفيلم الذي اثار اكبر خلاف فى الهند . والذي تم منعه #رسميا بحكم قضائي من العرض .. ومع ذلك .. حقق اعلى ارباح فى تاريخ السينما الهنديه ليكسر حاجز الـ 300 كرور داخل الهند والـ 600 كرور خارجها .. ولكن بعد 3 Idiots Movie Dhoom:3 The Movie اصبح من الطبيعي لعامر خان التفوق ليس على الاخرين ولكن على نفسه بشكل سنوي ..
الموضوع كبير اوي .. نخش فى التقرير
#القصه :
عالم فضاء يأتي من احد الكواكب لاستكشاف كوكب الارض ولكن اول ما يواجهه فى عالم البشر هو سرقة ما يربطه بعالمه .. ليتركه فى كوكب لا يعلم لغته او عاداته ولا يعرف سبيلاً لعودته ..
#بطولة:
عامر خان : بي كي "السكران" " المسطول "
انوشكا شارما : جاكو
سوشانت سينج راجبوت : سارفراز
بومان ايراني : شيري باجوا
سوراف شوكلا : الكاهن تاباسفي
سانجاي دات : بهايرون سينغ
#الاداء :
عامر خان : الانسان ده زى ماقولت من سنه فى تقرير دهوم انه قمه لوحده خارج المنافسات وخارج الخلاف .. انسان مش بيتنافس مع اى ممثل تاني انما بينافس نفسه .. وعشان كده النجاح هو اللى بيجري وراه .. بيقدم عامر شخصيه رائد فضاء جاي من كوكب شقيق لدراسة كوكب الارض .. بس بيتفاجئ بأفكار معقده وغريبه وناس بتتكلم لغه مبهمه .. جسد التيه والضياع .. احساس انك غريب فى عالم كامل مش مشكله اد ان الكارثه الحقيقيه ان محدش هيصدقك او اصلا هيسمعك .. وعشان كدة سموه السكران .. اللى دور على "اله" الكون دة .. واكتشف ان ما اكثر الالهه الكاذبه وان كل واحد بيعبد اله متفصل على مقاس افكاره واهوائه .. اختباره لمشاعر الحب ومحاولاته للكذب فى تجسيد شخصيه طفل كبير قادم للعالم .. كان وهمي .. ناهيكم عن انه يخربيته مبيكبرش وهو قصير اصلا وزي العسل .. ادائه يستحق 5/5
انوشكا شارما : اللى يقولى نفس دورها فى جاب تاك هاي جان هعوره .. البنت مش بس قدمت شخصيه مختلفه انما ستايل مختلف ووش عدى تحت مشرط جراح التجميل لما اتشلفط .. بتقدم دور جاغو الصفحيه اللى مش لاقيه موضوع تتكلم عنه وبالصدفه بتقابل بي كي عشان يغير حياتها ويحطها فى صراعات مش بس مع اهلها .. انما مع نفسها .. جسدت الشخصيه بخفتها المعتاده وحيويتها ونعومتها ولكن كمان قدمت شخصيه مسئوله وجاده .. عشان مطولش عامر مش سهل نجمه تقف قدامه وتقدر تجاريه .. ولكن انوشكا قدرت تكون قويه وشالت الفيلم مع عامر مكنش شغال لوحده .. ادائها يستحق 4/5
سوشانت سينج راجبوت : دوره كان صغير وادائه كان جيد .. مكنش عبقرى ولكن نجح فى انه يقدم دور الشاب الباكستاني المكافح فى شغله .. وللي ميعرفوش دة قدم فيلم Kai Po Che! Shuddh Desi Romance وكانوا جيدين .. ادائه يستحق 3/5
بومان ايراني : الراجل ده كان فاكهة الفيلم .. كالعاده بيضفي بهجه ومرح حتى لو كان بيقدم دور حانوتي .. كان رئيس القناه اللى بتشتغل فيها جاغو والمقدم اللى بيحب يمشي جنب الحيط .. دوره كان صغير وخفيف ومتقن يستحق 3.5/5
سوراف شوكلا : جسد دور الكاهن الرخم بحذافيره .. اللى يكرهك فى الدين وفى ربنا وفى العيشه واللى عايشنها .. دوره كان صعب ومهم وهو اتقنه الي حد كبير .. نجح فى انه يستفزني على الاقل ويعصبني يستحق 3.5/5
سانجاي دت : دوره كان صغير ولكنه كان جيد بحكم ان اللى قدمه هو سانجاي وهو بيقدم دور الشخص اللى ساعد بي كي فى انه يتعرف على الكوكب ولغته وصديقه الحميم يستحق 3/5
#تحليل:
- الفيلم مليان فاهتلاقوا الافكار متلخبطه اتحملوني -
* هحلل الفيلم من حيث القصه وبعد كده التحليل الفني *
بيناقش بي كي قضيه مش بتثير غضب طايفه معينه او اشخاص معينين .. لا بل قد تثير غضب كل من يؤمن بالله على وجه البسيطه اذا لم يتعامل معاها بحكمه وحنكه وذكاء .. وده اللي تقدر تسميه السهل الممتنع .. ودة العادي بردو من عامر .. الفيلم بيناقش اكتر من قضيه تعالوا نستعرض بعضاً منها :
1 - هاجم العنصريه من حيث الدين والعرق .. وظهر دة فى اول ربع ساعه فى الفيلم لما جاغو الهندوسيه قابلت سافراز المسلم .. وقالها ببساطه #الحب_يكفي .. بلاش كلاكيع الاديان والحدود الجغرافيه .. وعلى رأي زياد رحباني .. بلا كل هالمسخره .. ..
2- هاجم دفاع بعض المتشددين عن الله بحجة حماية دينه .. الموضوع على فكره مش مقتصر على دين وضعي او سماوي .. التوجه ده موجود عند الكل .. وسلط الضوء على نقطه مهمه اوى .. فكرك الاله اللى خلقك وخلق ملايين غيرك عاجز عن حماية نفسه .. !! طيب تفتكر ان انت يا نكره يا ذرة فى وسط كون ملئ بالمجرات والكواكب هتقدر تحمي الاله دة ؟ !!
3- هاجم الكهنة والشيوخ اللى بيفتوا ويخترعوا حاجات وينسبوها كذباً لربنا .. عشان يخدموا اهوائهم ويكسبوا احترام او ثقه او تبعيه .. وبيشوهوا صورة ربنا ويضعوا احمال كبيره على الناس .. وان دول لازم يكون فى وقفه ضدهم ومنصدقهمش .. لان الله برئ من امثالهم
4- هاجم الظاهريه .. الراجل اللي بدقن مسلم ودقن وشنب سيخي وبدون عمامه هندوسي .. تعالوا نجود ونخش مصر الفتاه المحجبه محترمه والغير محجبه متبرجه وحلال فيها التحرش والمنقبه ارهابيه وابو دقن سلفي وشنب ودقن اخواني عايز الاعتقال .. فى حين ان المظاهر خداعه -_-
5- هاجم كمان العمليات الارهابيه اللى بتتم باسم الدين .. فى مشهد واحد صغير لما تم تفجير محطه القطار من جماعه ارهابيه .. ودة لو قررنا نجود وندخل الشرق الاوسط هنلاقي داعش خير مثال ..
6- هاجم اشكال العبادات الخاطئه واللي بتتعمد اذلال الانسان واهانته .. ربنا مش سادي ولا عنده مركبات نقص زينا عشان نزحق على ركبنا ونجلد ونشوه نفسنا لاستجداء رضاه .. انما رحيم وبيحب عباده و اولاده ودى نقطه مهمه جدا كتير من الناس بيغفلوا عنها
7- هاجم الفكر الانساني بجملته لما قال ببساطه ان كلمة واحده لها مليون معني وبتعتمد على الموقف والايمائه ولغة الجسد .. ودة بيخلي ناس كتير تفهم بعض غلط وتخسر بعض كمان .. مش ملاحظين ان ده بيظهر اكتر فى مواقع التواصل الاجتماعي ؟؟! طااايب
8- حتي فى اخر دقايق من الفيلم هاجم الازدواجيه اللى بقت عندنا كلنا .. فى 3 جمل .. "سكان هذا العالم يحبون فى الخفاء لكنهم يتبولون علانية وفي الشوارع " .. تعالوا نجود وننزل ارض الواقع .. لو بنت قالت لبنت بحبك .. يبقى دة محن بنات .. لو بنت قالت لولد بحبك .. تبقى دي قلة ادب .. بس عادي جدا ومن حقك موت انك تعبر عن كراهيتك بمنتهي الفجاجه والقبح .. اصلها حريه -_-
9- الازدواجيه كمان مره فى تعدد الثقافات واختلافها .. اللى لابسه ابيض ممكن تبقى ارمله او عروسه واللى لابسه اسود ممكن تبقى ارمله او منتقبه وصباح اللخبطه
#تحليل_فني:
- الفيلم متصور فى شوارع الهند .. وبيناقش الواقع بدون احلام .. بدون هفهفه ساري وخرفان ..
- الادوار متوزعه بشكل سوي .. يعني مش مركزين على حد بعينه ومهملين الباقي ولكن ادوا الادوار حقها ..
- القصه فى النص الاول بتتسم بالكوميديا ولكن بيبدأ منحني العقده يتصاعد بشكل تدريجي وبيكون فيلم درامي جاد فى النهايه ودة بيخدم القصه والهدف ..
- الازياء فى الفيلم مناسبه جدا .. لبس انوشكا العملي ومكياجها الهادئ المعتاد كان ممتاز .. هدوم عامر المبعتره المبهدله منطقيه لواحد مكنش عارف اصلا ايه الفرق بين هدوم الرجاله والستات
- السيناريو فى الفيلم حكيم جدا ودقيق جدا وذكي جدا ودة شئ معتاد من الكاتب Abhijat Joshi كاتب فيلم 3 Idiots
- الاخراج محكم وقوي ومدروس بالمشهد .. ودة متوقع من المخرج Rajkumar Hirani مخرج فيلم 3 Idiots بردو .. هما نفس الشله قرروا يعملوا فيلم تاني زي ثري ايديوتس ونجحوا عادي جدا
- التصوير عجبني وشدني اوى .. مشاهد النجوم والسما ونظرات عامراللى كلها حنين لبيته بهرتني ^_^
- الفيلم كوميدي ودرامي بس لم يخلُ من الرومانسيه .. مشهد لما عامر بيقولها سجلت كل اللى بحبه على الارض ويطلع مش مسجل غير صوتها .. يخربيت كدة <3 .. منظره وهو بيمشي وبيعيط ومبصش وراه مره واحده .. مشهد تاريخي يافندم ..
- سيناريو الفيلم زي ماقولت مذهل بس احب اذكر منه اجزاء :
" البحث عن الرب امر ديني . لكن ايجاد الرب هو الحدث الاهم "
" هل انت من يخلق الاله ام الاله من يخلقك ؟ "
" ان اللعبه كلها تعتمد على عامل الخوف بل انه يستغل خوفنا ايضا "
"اى اله يجب ان اعبد جميعكم تقولون ان هناك اله واحد لكن فى الحقيقه هناك الهان اله خلقكم واله خلقتموه "
"انتم لا تعرفوا شئ عمن خلقكم لكن بالتأكيد الاله الذي خلقتموه يشبهكم تماما "
"من المسلم ومن غير المسلم ارني علامتهم .. الناس من تخلق العلامات والفروق وليس الرب "
- نهاية الفيلم عجبتني اوى مش انه رجع العالم بتاعه لا انه اتجنن ورجع الارض تاني وجاب اصحابه معاه
- انوشكا كانت اختيار ذكي فى الفيلم .. واعتقد دة من اهم ادوارها بيعجبني فى البت دى انها مش اباجورة .. انما عندها القدره انها تعمل افلام كبيره مع نجوم كبار بس كمان دور مهم واساسي .. ودة بيميزها عن غيرها .. بس هى نيلت ايه فى شكلها ؟؟
- بوستر الفيلم الاول اثار ضجه ضخمه ومنساش ان كتير منكم شتم الفيلم وشتم عامر وكتير منكم كمان قال نستني نشوف المحتوي لان عامر مش هيغامر ببوستر زى دة لعرض تافه .. المهم بقى انا عايزه اشوف رد فعل الحكومه الهنديه بخصوص بوستر فيلم OK وهو نفس بوستر بي كي بس البطله واحده ست 3:)
- يمكن مش كتير منكم يعرف ان Junaid Khan وهو ابن عامر خان كان مساعد مخرج فى الفيلم دة وانا اتوقع ان هيكون له اعمال ضخمه قريب
#الموسيقي_الاغاني:
الموسيقي عجبتني اوى وكانت مختلفه عميقه وحزينه شويه ومليانه شقاوه وفرحه شويه .. وتحس انها جايه من عالم تاني شويه ودة منطقي لما يجتمع كلا من
Shantanu Moitra Ajay Atul Ankit Tiwari
ودول من اعمالهم المختلفه ثري ايديوتس وراجنتي واجنيباث ومادراني واعمال موسيقيه ضخمه ..
كلمات الاغاني كانت بتخدم هدف الفيلم بردو ومكانتش حشو ولا بهدف التمطيط وكانت للجميل Swanand Kirkire ودة من اعماله كلمات اغاني بارفي وشادي كي سايد ايفكتس وانجلش فنجلش والبومات كلها نعومه ورقي كدة ^_^
نخش على المطربين <3 الالبوم ضم العندليب سونو نيجام و الجميل شان و الحنجره الذهبيه شريا جوشال .. فطبيعي الالبوم يكسر الدنيا .. ^_^
اكتر 3 اغاني علقوا معايا
"Love Is a Waste of Time" اغنيه كلها شقاوه ورومانسيه ومن زمان مسمعناش سونو وشريا مع بعض ^_^
"Chaar Kadam" دى فى الصميم بقي كلمات وموسيقي واداء وكله كله وبردو من زمان مسمعناش شان وشريا مع بعض ^_^
"Bhagwan Hai Kahan Re Tu" دى رغم انها دينيه الا انها رائعه عمق سونو وشجن الموسيقي خلقوا مع بعض سيمفونيه <3
#الفيلم_صالح_للمشاهده_العائليه
#تقييمي_له
4.8/5
#التقرير_هديه_لادمن_مي_عشان_عيد_ميلادها_وكده
يمكن تختلفوا معايا فى حاجات كتيره بس دة رأيى الشخصي و ما قدمة المخرج ...
#الفيلم_كان_لازم_ينزل_سينمات_مصر
هذا النص فقط ، يعكس وجهه نظر كاتبه . ولا يعكس وجهه نظر المدونه او مؤلفيها ، مع تحيات مدونة تقارير بوليود
تحويل كودإخفاء محول الأكواد الإبتساماتإخفاء