الكلام شوية عن ملكة من ملكات بوليوود "رانى موخيرجى "
... كل ما تيجى تشوفلها فيلم تفضل متنح قدامه ومنبهر بأدائها حتى لو كانت ضيفة شرف
من غير اى انحياز ولا حاجة بس انا بعتبرها من ممثلاتى المفضلات من العباقرة كده
من الاخر واحدة من الممثلات اللى ممكن تنجح فيلم لوحدها من غير اى بطل تانى والنوعية دى من
الممثلات بالذات انا بحترمها وبقدرها اووووى
تيجى تشوفها مع شاروخان تلاقيها حلوة مع سلمان ثنائى هايل ومع عامر برضه تلاقيها
حلوة وتشوفها لوحدها بقى تبقى منبهر ومش مصدق
و رانى بالرغم من انها من عائلة سينمائية الا ان دخولها عالم بوليود كان صعب هحكيلكم بعدين
كفاية مدح بقى
ندخل ف المفيد
صلوا بينا ع النبى كده
الاسم :رانى رام موخيرجى "تنتمى لعائلة "
موخيرجى وساماراث
" حد هيقولى ايه البتاعة المكلكعة دى يا مى نقوله اصبر على رزقك الدنيا اتخلقت ف ست ايام "
عائلة موخيرجى دى من اصل بتغالى " وده معناه ان رانى من البنغال "تحديدا من كالكتا ولاية البنغال الغربى " و عيلة ساماراث دى من ولاية مهرشترا حلو كده
العيلتين دول ارتبطوا ببعض لما تانوجا " الست ام كاجول " اتجوزت واحد من العيلة التانية دى "عيلة موخيرجى" سنة 1973 والعيلتين ارتبطوا ببعض ودخلوا مجال الانتاج السينمائى ومعظمهم مخرجين على منتجين على ممثلين "كوكتيل يعنى " وعيلة موخيرجى دى اللى منها رانى ... ينتمى ليها برضه كاجول و المخرج ايان موخيرجى "اللى اخرج فيلم يى جوانى هى ديوانى
كان نفسى اكملكوا شجرة العيلة
بس متخصناش
الاب : رام موخيرجى "مخرج ومؤسس استديوهات وكاتب ومنتج " راجل كشكول يعنى
الام : كريشنا روى " كانت مغنية لاغانى الافلام "
الديانة : هندوسية
تاريخ الميلاد : 21/3
الاخوة : هو اخ واحد اسمه راجا موخيرجى وبرضه منتج ومخرج
المهم ان رانى كان نفسها تطلع حاجة تانية غير التمثيل لما اتخرت من الجامعة...
بس كانت بتتعلم الرقص من الصف العاشر طبعا بحكم الديانة و المهرجانات بتاعتهم اللى بيرقصوا فيها وكده ما علينا
المهم ان وهى عندها بتاع 14 سنة كده حبت تمثل "تجربة يعنى " ومثلت ف فيلم pyar phool ابوها سنة 1992
بعدها بسنتين عرض عليها المخرج سليم خان بطولة فيلمه بس ابوها مرضيش انها تمثل وهى صغيره وبالتالى هى كمان رفضت وبعدها برضه نفس المخرج عرض عليها فيلم تانى وراحت موافقة بعد زن والدتها عليها بس حبت الاول انها تدرس التمثيل و اهى تجربة وهتعدى وده حصل ومثلت الفيلم الفيلم كان سنة 97 وكانت قصته حلوة اوى بس الفيلم فشل ولما فشل رجعت تانى رانى للكلية من جديد
لكنها انبهرت بنجاح كاجول قريبتها ف بوليود وقررت انها تمثل وتبقى دى وظيفتها
وبعدها كان دورها مع عامر خان ف فيلم غولام سنة 98 ... الفيلم نجح ودورها كان كويس لكن يمكن حاجة متعرفوهاش ان المخرج قرر رانى هتعمل الدور لكن صوتها هتدبلجه واحدة تانية يكون صوتها لايق ع الدور من الاخر كانوا بيقولوا ان صوتها تخين زيادة
ولما جم سألوها بعد كده اذا كان قرار المخرج ده اثر عليها بالسلب او لاء كعادة رانى ردت بدلوماسية وقالت ان صوتها مش مناسب للدور وبس
وبعد كده دورها مع شاروخان ف فيلم كوش كوش هوا هى
الفيلم كان البلوك باستر ف الهند كلها جمع ما لايقل عن بليون روبية وخدت 9 جوايز "اياميها كان رقم يعنى
" بالاضافة لجايزة رانى كأفضل دور مساعد
اصلا دورها ف الفيلم كان مكتوب لتوينكل خانا "لو متعرفوهاش فهى مرات اكشاى كومار و هى كانت بطلة فيلم شاروخان بادشاه " بس توينكل رفضت الدور وكل البطلات اللى كاران عرض عليهم الدور رفضوه لحد ما شاروخان وكاجول رشحوا رانى للدور بس كاران كان قلقان لانه هيضطر يجيب واحدة تانية عشان تدبلج دورها بس ده محصلش وهى حسنت من نفسها كممثلة ومن صوتها و عملت الدور وطلع زى ما انتوا شفتوه كده
ومن بعد نجاح الفيلم ودورها بقى يتعرض عليها ادوار لوحدها وعملت فيلمين كانوا مهيندى وهاللو برازر و الاتنين فشلوا من حيث النقاد او حتى النجاح التجارى
و مع سنة 2000 بدأت رانى تنفذ قرارها بأنها مش عايزة تكون بطلة افلام هندية عادية ودخلت ف ادوار كانت وقتها صعبة : رغم ان الافلام دى تقريبا منجحتش لكن النقاد بدأوا يثنوا عليها و يشوفوا هتعمل ايه
وبرضه فضل الفشل محالفها ف افلام زى hadh kar di aapne و kahin pyaar na ho gaaya
وبعد كده فيلمها مع سلمان وبريتى شورى شورى شوبكى شوبكى واللى نجح وهى كمان خدت عليه جايزة وكمان لانه كان اول فيلم يتعامل مع حكاية الام البديلة
بالمناسبة انا بحب اوى ثنائية رانى مع بريتى زينتا هما طلعوا مع بعض ف اربع افلام 2 مع سلمان و2 مع شاروخان واللى مع سلمان كانوا شورى شورى شوبكى شوبكى وهار دل جو بيار كاريجا ومع شاروخان كانوا فير زارا و كابى الفيدا نا كيهنا
المهم رانى بدأ النجاح يحالفها مع سنة 2002 مع شركة ياش راج فيلم و فيلم مودسى دوستى كاروجى مع ريثيك روشان وكارينا كابور وكمان فيلم ساتيا مع فيفيك اوبيروى واللى شاروخان ظهر فيه ضيف شرف وكان الفيلم نسخة لفيلم تاميلى والاتنين نجحوا جدا وتقريبا فيلمها مع فيفيك ده كان نقطة تحول كبيرة ليها اخدت عليه جايزة احسن ممثلة من راى النقاد ف الفيلمفير وكانت مرشحة لجايزة احسن ممثلة من رأى الجمهور والناس قالوا ان الدور كان مناسب ليها جدا من كل النواحى وانها ابدعت فيه
و ف سنة 2003 بقى جت لرانى الفرصة لما شاروخان اختارها تقف قصاده بطلة ف فيلمه شالتى شالتى بعد لما صمم ان لازم ايشواريا تسيب الفيلم بسبب المشكلة المعروفة وانتوا تقريبا عرفتوا جوانب المشكلة المهم ان رانى اخدت دور ايشواريا ف الفيلم لكن لحد النهاردة شاروخان مصمم ان الدور كان لرانى من الاول
المهم ان الفيلم نجح ورانى اخدت تانى ترشيح ليها كأحسن ممثلة
وبعدها عملت كام فيلم ملهمش لزمة ولا نجحوا خالص وكانوا شورى شورى و كالكوتا ميل و لوك كارجل
سنة 2004 كانت سنة الحظ بالنسبة لرانى لانها اخدت فيها جايزة احسن ممثلة وجايزة احسن ممثلة مساعدة مع بعض ف نفس السنة وهى الممثلة الوحيدة اللى اخدت الجايزتين مع بعض
الجايزة بتاع الدور المساعدة كانت عن فيلم يوفا مع ابهيشيك باتشان العسل واللى الناس كلها اجمعت انها كانت احسن بنت ف الفيلم
والجايزة بتاعة احسن ممثلة كانت لفيلمها هم توم مع سيف على خان والفيلم كان حلووو اووى وكانت الفيلم الاول ف السنة
وبعد كده دورها ف فيلم فير زارا اللى النقاد اشادوا بيها وبدورها وقالوا ان التمثيل بدون كلام بس من خلال العنين فن اتقنته رانى ف الفيلم واخدت عنه احسن دور مساعد والفيلم كان برضه انجح فيلم ف السنة
و ف 2005 عملت رانى افلام ثبتت وجودها ف بوليود واثبتت انها من احسن بنات جيلها وكان الفيلم الاسطورة بلاك مع الاسطورة اميتاب باتشن والفيلم خد جوايز ملهاش اول من اخر منهم 11 جايزة فيلمفير و جايزتين وطنيتين واخدت رانى جايزة احسن ممثلة من الجمهور وجايزة احسن ممثلة من النقاد وبرضه كانت اول واحدة تاخد الاتنين ف نفس السنة
من احسن الناس اللى وقفت قدام رانى كان ابهيشك باتشن ف فيلم بانتى اور بابلى والفيلم كان ليه نجاح كبير اوى
وكان بعده عودتها لشاروخان تانى مع فيلم بيهلى
الفيلم فشل ف الهند بس نجح بره وبعد كده مع شاروخان كابى الفيدا نا كيهنا واخدت فيه جايزة احسن ممثلة وقالوا ان دورها ده عمره ما هيتنسى ابدا
وفيلم بابول وده مكنش ناجح اوى وكان اخر ظهور ليها سنة 2006
وبعد كده ف 2007 عملت رانى 3 افلام مع سيف على خان انجحهم تارا رام بام و يلم لاجا شونارى مى داج كان بطولة مطلقة ليها وابهيشيك كان ضيف شرف بس كان عسل برضه والفيلمين نجحوا وهى كالعادة اترشحت لجايزة احسن ممثلة والفيلم التالت كان ساواريا مع رانبير افندى وده فشل
والصحافة بعد كده سمت رانى انها البطلة الحصرية لشركة ياش راج
وبعد كده ف 2008 و 2009 كان فيلم thoda pyaar thoda magic مع سيف على خان و dil bole hadippa مع قمر بوليود شاهد كابور بس الاتنين كان نجاحهم متوسط
وبعد كده مكنش ليها اى افلام ف 2010 وف 2011 و2012 كان فيلمين الاول كان ثنائيتها مع العبقرية فيديا بالان no one killed jessica و التانى كان talaash مع العبقرى عامر خان وكارينا كابور
و ف 2013 ظهرت ف فيلم bombay talkies
و فيلمها ف 2014 فيلم Mardaani واللى كان من احلى افلام السنة
رانى موخيرجى اول واحدة تفوز بجايزة احسن ممثلة واحسن ممثلة مساعدة ف سنة واحدة
وبرضه اول واحدة تفوز بجايزة احسن ممثلة للجمهور واحسن ممثلة للنقاد ف سنة واحدة
رانى فيلمها مع شاروخان paheli دخل المسابقة الرسمية للاوسكار
رانى اتعرض عليها افلام هيوليودية ورفضتها عشان مش هتقدر تلتزم بيها
رانى طلعت عليها اشاعات كتير عن ارتباطها بجوفيندا وابهيشيك باتشان لكن مقدروش يثبتوا عليها حاجة
لكن اهم الاشاعات اللى طلعت كانت اشاعة خلافها مع بريتى زينتا ف تصوير فيلم كابى الفيدا نا كيهنا
اتجوزت رانى من اديتيا شوبرا ف 2014 وتخنت بعد الجواز ويارب تخس تانى
هذا النص فقط ، يعكس وجهه نظر كاتبه . ولا يعكس وجهه نظر المدونه او مؤلفيها ، مع تحيات مدونة تقارير بوليود
تحويل كودإخفاء محول الأكواد الإبتساماتإخفاء