طائشين ومجانين لكن رائعين .. Yeh Jawaani Hai Deewani 2013
****************************************
كلنا فى مرحلة الشباب بنتخبط .. بين الاحلام والواقع .. بنتأرجح بين تشبث القلب واصرار العقل .. بنتألم من اختيارات صائبه وبدائل كانت واجبه .. انها مرحلة الطيش .. انها مرحلة الشباب .. هو دة فيلم انهارده .. مش هطول عليكوا .. هبدأ التقرير علطول :
#القصه :
بانى .. الشاب الطموح اللى بيترك اصدقاؤه عشان يحقق حلمه .. ولكن بعد مايرجع هيكتشف انه ترك اشياء كتيره وراه .. اهمها .. حبيبته ..
#بطوله:
رانبير كابور : بانى
ديبيكا بادكون : ناينا
اديتيا روى كابور : افيناش
كالكى كوشلين : اديتى
#الاداء :
رانبير كابور : دوره مكانش جديد .. ومكانش عبقرى .. يعنى اداؤه فى Barfi! RockStar Movie كان اقوى بكتير .. فى الفيلم هو الشاب الطموح .. اللى كل حلمه انه يطير .. حتى ولو كان دة على حساب اهله واصدقاؤه وحبيبته .. يعنى عكس دوره فى Wake Up Sid تماماً .. رانبير عموما بقى نجم صف اول بسبب ذكاؤه فى الاختيارات .. ودة انا اتكلمت فيه معاكم كتير .. ان حتى لو الموهبه ضعيفه الاختيار الذكى هيساعدها وانتوا اكيد عارفين نجوم شباب موهوبين جداً ولكن سوء اختيارهم هو اللى جايبهم ورا
ديبيكا بادكون : بردو مش اقوى اداء ليها .. هى قدمت الشخصيه الخجوله لطبيبه .. عاقله جداً حبت انسان ولكنه سافر قبل حتى مايعرف انها بتحبه .. مزعلتش عليه ولا انتظرته .. بس منسيتهوش .. ادائها كان بسيط وناعم .. مش بجبروت Ram-Leela .. بس عشقت فيها طريقة كلامها معاه وهى فاقده منه الامل كدة .. كانت عسل
اديتيا روى : الواد دة اكتشاف .. دوره كان جميل فهو الصديق اللى رغم حبه لصديقه الا انه حزين لانه فضل عليهم احلامه .. اللى بنى مع صاحبه خيالات واتهدت بتذكره طيران ...
كالكى كوشلين : بصرف النظر عن ان شكلها فى حاجة غلط بس دورها كان حلو اوى .. حبيت جداً حبها لاديتيا من طرف واحد .. وصمتها ونضوجها بعد 8 سنين .. دورها كان جميل يمكن كان احلى من دورها فى فيلم Zindgi Na Milegi Dubara
#تحليل :
- مبدأيا الفيلم من اخراج ايان موخيرجى ودى تانى تجربه اخراجيه له .. ومن انتاج كاران جوهر .. ماهى القصه دى والسيناريو دة والعفويه دى لازم يكون فيها تاتش كاران جوهر .. بشم ريحته اول ماشوف الفيلم
- قصه الفيلم مش تقليديه .. اها هى بتتكلم عن جروب مجنون .. بس جمالها انها جابتهم فى مرحلة شبابهم و #بعد مرور 8 سنين انفصلوا فيهم عن بعض وبيتجمعوا ونبدأ نشوف نضوجهم .. تغيير ميولهم .. نظرتهم للحب اللى نسيت اللى كانت بتحبه .. واللى لقى حبيبته .. الفيلم ناقش قضية اننا فترات العمر والانتقال من الشباب للنضوج بيكون فارق فى حاجات كتير
- تطور الشخصيات عجبنى ... رانبير حبيته فى النص الاول وحبيته اوى فى النص التانى ... ديبيكا ادائها كان ثابت شخصيتها ماتغيرتش فى النصين .. اديتيا روى اداؤه فى النص التانى كان فى حركه اكتر من الاول كالكى نضوجها كان واضح وصريح لانها كانت اكتر واحده طايشه فيهم ..
- الفيلم ماشى بنظام الراوى .. والراوى هو ديبيكا .. حبيتها وحبيت صوتها .. وهى بتبدأ الفيلم بالكلام عن الذكريات
- سيناريو الفيلم #لذيذ .. حبيته اوى .. 40% من حبى للفيلم بيقف على السيناريو بتاعه .. والسيناريو هنا ممتع لاقصى حد ..
- مشاهد ديبيكا ورانبير حبيتها اوى .. وجعتنى جداً لما بتقوله لو وقفت قدامك 3 ثوانى هحبك تانى .. وانت مش هتحبنى تانى .. وخصوصا ان دة اول فيلم ليهم مع بعض بعد انفصالهم وطبعاً الكل عارف ان ديبيكا لازالت بتحب رانبير وقالت فى كتير من اللقائات انه لو رجعلها مش هتسيبه ابداً
- اضافه مادهورى ديكشت كان احلى هديه .. اللى متعرفهوش ان مكانش فيه الاغنيه دى اصلا ... انما هما قالوا ان رانبير عايز يرقص مع مادهورى .. فاكتبوا الاغنيه دى مخصوص عشانها .. حقيقى ليدى وموزه وجامده وست الكل مادهورى ديكشت .. بعشقها اوى
- موسيقى الفيلم كانت جميله جداً واغانيه هنتكلم عنها بعدين بالتفصيل ..
- رقصات الفيلم كانت جميله .. ديبيكا دانسر كويسه بس مش توب لان من وجهة نظرى كاترينا كيف متربعه على عرش الراقصات من بين بنات جيلها ... ورانبير مش وحش .. بس بردو ميقدرش ينافس شاهيد كابور فى موهبته ..
- الفيلم دة فى حبة كوميديه تهبل .. مواقف تخليك تضحك من قلبك .. وفيه شوية رومانسيه توجع قلبك .. فيه مشاعر عجبتنى اوى وحبيتها اوى
- نهاية الفيلم مكانتش مفاجئه كانت متوقعه .. بس الطريقه اللى اتقدمت بيها كانت عثوووووله اوى
#سلبيات :
- الفيلم مش رهيب .. رغم الكاست رغم الاداء رغم الاخراج .. بس حسيته #عادى .. !!
- مدته كانت سلبيه تانى .. 3 ساعات الا تلت .. اول مره اقعد قدام فيلم هندى وابص فى الساعه فى حين انى متعوده على الافلام الطويله اللى بتقعد بالتلت ساعات و نص .. بس الفيلم دة مكنش محتاج كل الوقت دة .. ممكن ساعتين حلو اوى عليه ..
- مش عارفه احطها فى السلبيات ولا التحليل .. بس الفيلم فكرنى بـ Break Ke Baad مع طبعا ان الادوار كانت معكوسه .. يعنى كنا محتاجين تجديد شويه .. بس فيلمنا بردو كانت قصته يمكن اعم شويه ..
#الاغانى :
الالبوم حلو مش هيعلق معاكم كله الا شويه اغانى ..
وضم فنانين زى Mohit Chauhan Sunidhi Chauhan Arijit Singh
"Badtameez Dil" : من اقوى اغانى الفيلم .. وهتحبوها جداً مليانه حيويه وجمال ..
"Subhanallah" فى نعومه كدة .. فى جمال زى كدة .. كمية الرومانسيه اللى فى الاغنيه دى .. ونظرات ديبيكا فيها .. تعقد
"Ghagra" روحى يا مادهورى منك لله .. عقدتينى من نفسى .. الاغنيه تحفه وكلماتها تحفه ورقصة مادهورى تحفه بردو .. واداء رانبير كان عثول وكيوت اوى اوى اوى
الفيلم بأختصار ناعم .. ممتع .. شخصياً بعشق ديبيكا ورانبير على الشاشه مع بعض .. بالنسبالى بيبقوا قمة الابداع سوا
هتشوفوا الفيلم مره واتنين وتلاته .. بس للتسليه .. هتستمتعوا فيه بشكل مش طبيعى
الفيلم #صالح للمشاهده العائليه
تقييمى
3.6/5
هذا النص فقط ، يعكس وجهه نظر كاتبه . ولا يعكس وجهه نظر المدونه او مؤلفيها ، مع تحيات مدونة تقارير بوليود
تحويل كودإخفاء محول الأكواد الإبتساماتإخفاء