علاقة سيف على خان ومراته الاولى أمريتا سينغ
سيف انتوا طبعا عارفينه لكن امريتا سينغ مظنش طتير يعرفوها هفكركوا بيها " الست اللى طلعت ف الفيلمين بتوع ارجون كابور Aurangzeb (film) كانت مرات ابوه وكانت امه فى فيلم 2 States Movie " لكن طبعا هى زمان كانت ممثلة قوية جدا وعملت افلام قوية مع نجوم كبار زى سونى ديول واميتاب باتشن و سنجاى دات وانيل كابور
وقت لما اتجوزوا كانت هى اكبر منه بحوالى 12 سنة
الناس كانوا بيقولوا ان هى اللى وقعته واتجوزته وانا متفقه معاهم .. لما اتجوزوا كان هو عنده 21 سنة وهى عندها 33
بس هو سيف غريب مذبذب كده ومتردد امريتا كانت مراته وعلاقته بالموديل الايطاليه وحبه لكارينا المستخبى هو طالع زى عيلته علاقاته النسائية كتيرررة
اهل سيف اصلا كانوا معترضين ع الجوازة دى من الاول ومكانوش موافقين بتاتاً وده لاسباب منها ان هو مسلم وهى من السيخ و كمان عشان فرق السن بس على مين " ف الحب كله بيقع ويطب " اتجوزها ف السر
اول مرة قابلها كان فى فيلمه مع كااجول و حسوا وقتها ان فى نوع من الاتصال الغريب بينهم وبعدها بيومين كلمها سيف عشان يعزمها ع الغدا بس هى رفضت وقالتله مبخرجش اتعشى مع حد تعالالى انت وهو قال انها شخص لطيف و انسانة كويسة والكلام ده
اتجوز سيف امريتا سينغ سنة 1991 و سنة 1993 اول ما بقت هى حامل ف سارة سابت التمثيل وقعدت ف البيت عشان تربى العيال ورجعت تانى سنة 2002
والحياة كانت ماشية فل وزبادى ف الخلاط حلوو كده ؟ لا مش حلو
عشان هما اطلقوا سنة 2004 بعد جواز دام 13 سنة
ودى مش مفاجئة ولا حاجة ده كان وضع طبيعى جدا واحدة اكبر من جوزها ب 12 سنة مع مرور السن هى هتعجز و هو لسه زى ما هو فطبيعى انه يلعب بديله خصوصا ولو كان عنده استعداد اساسا زى سيف
لما اتطلقوا كان عندهم سارة وابراهيم وابراهيم نسخة من ابوه
زى اى اتنين بيمروا بمحن ف حياتهم وبيستحملوا ويعدوا عشان الحياة تمشى لكن عنيين سيف كان يدب فيها رصاصة وانها كانت بتفوت حاجات كتير متتفوتش
وكانت القشة اللى قطمت ضهر البعير هى خيانته ليها مع المودل والرقاصه الايطالية روزة كان ممكن تسكت ومتفضحوش وتطلب الطلاق بهدوء بس هى خلت اللى ما يشترى يتفرج الحقيقة
وطلبت الطلاق و مكنش فيه حل غير الطلاق واجبرته يطلقها
وهو طلقها فعلا بس دفعها تمن الفضيحة اللى عملتها علق كل حساباتها ف البنوك "متنسوش انه من عيلة ملكية " ومبقاش يديها اى دعم مالى عشان تربية سارة وأبراهيم
بعدها أمريتا راحت التليفزيون وقالتلهم انها عايزة وظيفة بأى شكل وبأى مرتب المهم انها تشتغل عشان تربى العيلين ولادها
سنجاى دات وقتها عرض عليها مساعدات مادية بس هى رفضت بأدب وفضلت انها تعتمد على نفسها
وبدأ صناع الافلام يعرضوا عليها ادوار ف الافلام والمسلسلات عشان عارفين انها محتاجة تشتغل :( وهى برضه ممثلة شاطرة
وربت امريتا الولد والبنت من غير اى مساعده من ابوهم او جدودهم
بس دلوقتى الامور بدأت تتحسن وبدأت علاقة سيف بأولاده تكون كويسة وحتى علاقته بأمريتا بقت احسن من زمان خصوصا ان فات على كل الحوارات والمشاكل دى بتاع عشر سنين
المهم بعد الطلاق سيف فضل على علاقة بروزة شوية لحد ما قابل كارينا كابور "حبه المستخبى " فى فيلم تاشان ولقى فرصه انه يتكلم معاها و يقضوا وقت ف التصوير مع بعض وطنش روزة واداها الصابونة التمام
و روزة غارت من كارينا لانها بوظت لها الدنيا وراحت قالت لشاهد ان كارينا على علاقة بسيف بس شاهد كان خلاص هو وكارينا علاقتهم بايظة لوحدها
وبعدها ارتبط سيف بكارينا واتجوزوا قريب والواضح انه بيحبها اووى بس طبعا الطبع مبيتغيرش وممكن ف يوم وليلة نصحى الصبح نلاقيهم اتطلقوا
فى فترة طلعت اشاعات ان امريتا ممكن ترجع لسيف تانى بس هى طلعت ونفت الكلام ده وقالت انها مستحيل ترجع وانها كمان مش عدوته
و علاقتهم دلوقتى الى حد ما كويسة وفى اطارها الطبيعى ومبقاش فى اشاعات خصوصا بعد ما سيف خلاص اتجوز كارينا وكله تمام وهو بقى صديق لاولاده وبيشوفهم دايما
وهى متجوزتش من بعد ما اطلقوا عشان العيال سارة وابراهيم
طبعا حدوتة تنفع فيلم هندى بس زى ما بنقول حياتهم فعلا زى الافلام
طبعا فى ناس ممكن تتضايق من سيف بعد اللى قولته ده بس لازم تعرفوا ان دى حياته الشخصية واحنا ملناش دعوة بيها احنا لينا افلامه اللى بتنجح و محدش يقدر ينكر انه من الضلوع الاساسية ف بوليود
هذا النص فقط ، يعكس وجهه نظر كاتبه . ولا يعكس وجهه نظر المدونه او مؤلفيها ، مع تحيات مدونة تقارير بوليود
2 التعليقات
إضغط هنا لـ التعليقاتقال يا مأمنه للرجال يامأمنه للميا في الغربال
ردماتكلمت عن فارق العمر بين سيف وكارينا نفس الفارق الي بينو وبين امريتا علئ فكره الاجانب مش زي العرب ماعندهم التفكير السطحي في موضوع العمر عشان كدا سيف ماخان امريتا عشان في فارق في العمربينهم بس دا طبيعه في الرجل اكبر اصغر بيخون
ردتحويل كودإخفاء محول الأكواد الإبتساماتإخفاء