بانج بانج .. Bang Bang
احد الافلام اللى اعتبر يوم افتتاحها هو واحد من اكبر الافتتاحيات فى تاريخ بوليوود .. بس استنوا .. دة مش الخانات .. انما المنافس اللى حفر اسمه فى تاريخ بوليوود دون الانتماء ل خان او كابور .. انه ريتك روشان يا ساده
دة الفيلم اللى تخطت مشاهدات التريلر بتاعه 2.33 مليون مشاهده على اليوتيوب فى خلال 24 ساعه ليكون اضخم تريلر فى تاريخ بوليوود
القصه :
عمر زافار احد اكبر زعماء المافيا فى الهند يطلب سرقة جوهرة الكوهينور وبالفعل بيتم سرقتها من حرامي زى القمر .. راجفير ولكنه بيرفض يبيعها وبيبدأ فى رحلة مطاردات لايجاد عمر زافار .. وتقع ضحية المطاردات دي هارلين ساهاني موظفة استقبال ببنك شيملا .. فى رحلة ولا فى الاحلام تنتهي بوقوعها فى الحب مع اكبر لص مصاب بأنفصام ويبحث عنه الانتربول ..
الفيلم_بطولة :
ريتك روشان :راجفير ناندا
كاترينا كيف : هارلين ساهاني
داني دينزونجبا : عمر زافار
جافيد جيفرى : حامد جول
الاداء :
ريتك روشان : مش عارفه اقول عنه ايه .. بس هو احلو اكتر بعد ماطلق سوزان .. كان عبقري .. رومانسي .. قوي .. مرن .. حاولت اطلعله غلطه واحده ملقتش .. كان شايل الفيلم على اكتافه من اول مشهد لاخر مشهد .. وزي ماقال النقاد .. توم كروز بوليوود هو ريتك روشان .. ابهرني فى مشهده مع كاترينا فى الكافيه وهو بيقولها "يوما ما " كان بينور .. وعجبني فى مشهدهم على الجسر لما قالها طالما شكه فيا اضغطي على الجهاز ... بالنسبالي دة اقوي اداء "اكشن" عمله ريتك فى مسيرته حتى اقوي من دهوم 2 .. اللوك بتاعه فكرنى بيه فى Kites (2010 film) Zindagi Na Milegi Dobara .. باختصار يستحق 4.8/5
كاترينا كيف : مش هقارن بينها وبين كاميرون دياز مبدأياً .. دورها كان فاكهة الفيلم .. كانت خفيفه وكيوت ... اينعم انا مش ببلع اي ممثله مع ريتك غير كارينا <3 .. بس لما يبقى فيلم فيه اضخم راقص واضخم راقصه فى جيلهم .. الموضوع مختلف .. ادائها كان على اد الدور مكنش اقل ومش قادره افهم ايه سبب هجوم النقاد عليها .. دورها كموظفه سينجل وبتحلم بالارتباط .. متذبذبه وخجوله .. مندفعه احيانا .. كل ردود افعالها كانت منطقيه .. عجبتني وهى فى التواليت بتنضف الفستان وبتقول البنات فى البنك هيغيرو مني .. - البت دي اصلها من شبرا - بالنسبالى دورها كان اقوي من دورها فى دهوم 3 .. تستحق 3.5/5
داني دينزوجبا : اضافته كانت حلوه ومتوقعه الراجل دة بيفكرني بأمريش بورى معرفش ليه .. نفس تبريقة العيون اللى تخض .. منكرش انى توقعت ارفان خان .. يبقى عمر زافار بس مرحناش بعيد .. دوره كان صغير بس قوي وكمل الفيلم يستحق 3.5/5
جافيد جيفرى : بالنسبالي زيه زي ريتش ديشموخ .. مبقتنعش بيهم غير فى الكوميديا وبيضحكوني من قلبي .. بس كمان فى الدراما جافيد بيبقى قوي اوي .. استمتعت بدوره ولو اني حسيت دمه واقف شويه .. وانه تكلف فى ابداء الشده .. ادائه يستحق 3/5
تحليل
- الفيلم بدايته زي اى فيلم مصروف عليه عربيه ومبني كله ازاز .. مكانتش مختلفه كتير عن اى فيلم اكشن احنا عارفينه .. وللعلم دة يعتبر واحد من اغلي الافلام فى تاريخ بوليوود
- الفيلم قصته قويه وحبكته مثيره رغم انه سهل تكتشفها .. انا فهمت الليله لما راجفير قابل حامد جول وقاله عايز عمر زافار .. قولت بس الواد دة بوليس ودى كلها لعبه .. الحبكه كان ممكن تبقى اقوي من كدة
- سيناريو الفيلم مش اقوي حاجة .. ودة شئ متوقع من فيلم غرضه المتعه والحركه .. ولكن شدني حوارهم فى الكافيه وهو بيقنعها ان "يوما ما " دة ممكن ييجي واحنا منعرفش واننا احنا اللى بنعمل اليوم دة .. ومن الجدير بالذكر ان الكتاب هم : Sujoy Ghosh ودة مكتبش افلام قويه انما شاركه ايضا Suresh Nair ودة كاتب فيلم Salaam E Ishq Kahaani .. ودى بردو افلام لا يعتبر السيناريو فيها كان قوي ..
- احداث الفيلم مش تصاعديه انما شويه تطلع وشويه تنزل .. بس اللى عالج دة يمكن مشاهد الاكشن .. اللى مش اوفر اوي .. انما جيده الى حد ما .. وطبعا دة بفضل مخرج الاكشن اندي ارمسترونغ الحمدلله ان مخرج الاكشن امريكي مش هندي والا كنا هنشوف العجب
- الفيلم اتصور فى بلدان كتيره زى براغ تايلند اليونان وابو ظبي .. يعني هتلفوا فى رحله ملهاش نهايه
- نهاية الفيلم عجبتني اوى .. انها قدرت تاخده وترجعه لاهله تاني .. وعاشوا سوا .. نهايه ممتعه بالنسبه لفيلم لايت وجميل ..
- الفيلم مش شبه نايت ان داي الا فى الشخصيات انما القصه مختلفه بشكل كبير .. ودى حاجه تحسب لبوليوود انها قدرت توظف طاقتها فى انها تغير الفيلم بصوره كامله فانا مقدرش اقول ان ده Remake لاني هبقي بظلم بانج بانج ..
- الفيلم من اخراج Siddharth Anand ودة اخراج افلام زي Salaam Namaste Anjaana Anjaani .. بس دة يعتبر اقوي فيلم هو اخرجه فى مسيرته ..
- موسيقي الفيلم كانت قويه جدا ودة شئ متوقع لما تكون للعمالقه Vishal–Shekhar .. ودول عملوا موسيقي افلام كتيره زى هابي نيو يير تشيناي اكسبريس واوم شانتي اوم ستودنت اوف ذا يير انجانا انجاني وسلام نمستي ..
- من الجدير بالذكر ان الفيلم اتعرض الاول على شاهيد كابور ولكنه رفض لانه خاف يقع في فخ المقارنه مع فيلم بحجم نايت ان داى .. ومقارنته مع توم كروز .. ولكن ريتك روشان قبل التحدي ونجح .. وشاهيد قدم رائعته حيدر والاتنين قدمولنا فيلمين مش هيتكرروا فى التاريخ
- ريتك روشان اجره فى الفيلم كان 30 كرور .. وبكده هو يعتبر واحد من الممثلين الاعلي اجرا فى بوليوود .. عامر خان بياخد 40 كرور .. سلمان بياخد من 25:30 كرور .. شاروخان واكشاي كومار من 20:25 كرور .. ودول يعتبروا اعلي النجوم اجرا فى بوليوود .. ويقال ان ريتك هيكون اجره في فيلمه القادم MohenjoDaro 50 كرور وبكده هيكون الممثل الاغلي والاعلي اجرا فى بوليوود ..
الاغاني :
زي ماقولت الموسيقي لفيشال شيكار وكلمات الاغاني لـ كومار و فيشال دادلاني وانفيتا دت ..
" Tu Meri " تعتبر من اروع الاغاني اللى اتقدمت فى 2014 مع استعراض قوي جدا ويعد من اقوي رقصات ريتك روشان ..
"Uff" كاترينا كانت مبدعه فى الاغنيه دي وخصوصا وهي بترقص بوسطها .. كلماتها حلوه والموسيقي بتاعتها خفيفه ولايقه على جو الفيلم
"Meherbaan" الاغنيه دى جميله بس MP3 .. حسيت الكليب اوفر وفكرني بالاغنيه الرومانسيه اللى لازم البطل فيها ياخد البطله على الجبال او الميه .. بس دة ميمنعش انها ممتعه جدا ..
الفيلم هتشوفوه بدل المره خمسين
صالح_للمشاهده_العائليه
لو تجاهلنا الحاره الضيقه اللى راجفير اخد هارلين فيها
تقييمي
3/5
Bosy
هذا النص فقط ، يعكس وجهه نظر كاتبه . ولا يعكس وجهه نظر المدونه او مؤلفيها ، مع تحيات مدونة تقارير بوليود
تحويل كودإخفاء محول الأكواد الإبتساماتإخفاء