تقرير عن فيلم Holiday 2014 ~ تقارير بوليود وأخبار النجوم

تقرير عن فيلم Holiday 2014

ياصديقى , انها مجرد عطله .. Holiday

ومن جديد اكشاى كومار .. حد هنا مش بيحبه .. ؟ .. لا .. حلو اوى .. نبدأ بقى

#القصه :
كابتن فيرات ظابط بوكالة الدفاع والجيش الهندى يزور اهله فى عطله شهر .. ليتزوج .. لكن يكتشف انه بصدد كشف تنظيم ارهابي ضخم ..

#بطولة :
اكشاى كومار : فيرات
سوناكشى سينها : سايبا
سوميت راجفان : ماكوند "ظابط صديق فيرات "
فريدى داروالا : على

#الاداء :
اكشاى كومار : خيلادى بوليوود .. وفى كل تقرير عنه مش هقول غير انه خيلادى بوليوود .. الراجل دة عبقرى .. صنع اسم من الماس رغم انه لا ينتمى لخان او كابور .. دة اول فيلم يطلقه فى 2014 واعتقد انه الاقوى على الاطلاق .. بعد رائعتى Special Chabbis Once Upon a Time in Mumbaai 2 يعود الينا بهوليداى ..

كضابط بالجيش الهندى وايضا ضابط بالاستخبارات الدفاعيه .. امن دوله وكدة .. شخصية فيرات كضابط .. صارم جداً ذكى جداً ومجنون وسادى الى حد ما بحكم عمله .. كان ممتاز .. بجانب كل دة يحمل قلب طفل بيخجل وبيحب وعنده حس فكاهه راقى ... فى شخصيه متكامله قدمهالنا كطبق شهى .. مش من السهل توقع ردود افعال فيرات طول الفيلم .. لانه مجنون   .. ماشى بمبدأ لا قوانين فى الحرب .. معندوش مانع يقتل اى حد لو كان هو شخصيا .. معندوش مانع يخاطر بحياة اى حد ولو كانت اخته ..

كان اداء اكشاى موزون .. هادئ .. ناضج .. ودة مش حاجة جديده عليه
اديله 4/5

سوناكشى سينها : البت دى عملت عملية تجميل .. لا خست مش كدة .. بقت زى القمر بزياده .. اينعم ادوارها فى تقدم وبدأت تقدم دور البنت العصريه وخرجت من مود الكلاسيكيات .. ولكن لازالت مصره على دور الاباجوره فى كل افلامها ..

دورها مكنش مؤثر .. تعرف دور البطله مهم ولالا .. عن طريق انك لو حذفته هل هيأثر على سير القصه ولالا .. معظم ادوار سوناكشى ثانوى .. فهى البطله اللى بتتحب وبس فى افلامها .. بأستثناء Lootera عشان ادمن مى ماتقتلنيش ..

ادائها لشخصية سايبا البنت الملاكمه اللى بتقع فى غرام الضابط الهمام .. كان بسيط اوى .. بنت حتى متعرفش حقيقة الوحش الكامن خلف ضابط الجيش دة .. دمها خفيف وكيوت وبس !!

تم اضافتها للفيلم كعنصر نسائى يطرى القعده شويه بدل ماهى كلها ضرب ورزع وتخبيط .. بس الاكيد ان سوناكشى عندها موهبه ولسه مقدمتهاش بفيلم يليق بيها ..
ادائها يستحق 3/5

سوميت راجفان : مقدمش افلام كتير قبل كدة يمكن اكبر دورين قدمهم فى مسيرته كانوا U Me Aur Hum My Name Is Khan - Official Page .. دوره فى الفيلم هنا كضابط الشرطه صديق فيرات ... كان رائع .. كوميدى ملئ بالعفويه .. شخصيه الضابط الملتزم بالقانون ... مع شخص مبيهموش القانون .. بيخلق مواقف بينهم كوميديه جداً وهو متفاجئ على طول الخط ومصدوم من اللى بيعمله صديقه فى #الاجازه   .. دوره كان مسلى وجميل ويستحق 3.5/5

فريدى دارولا : اول ما شفته قولت العيون دي باكستنائيه .. وطبعاً طلع كلامى غلط والواد هندى اصيل   .. اعرفكم عليه سريعاً هو مودل وظهر قبل كدة فى دور ثانوى فى فيلم ثانوى بردو .. ودة يعتبر اول ظهور حقيقي ليه .. بالاضافه الى ان عينيه تعقد يا جدعان

دوره كزعيم الخلايا النائمه كان رائع .. شاب بل طفل يدير مجموعة من اكبر مجموعات الارهاب فى البلد .. بقى موضوع شائع على فكره ولما اكتبلكم تقرير Mardaani - The Film هتفهموا قصدى .. دوره كان ممتاز .. مدروس .. كل نظره كل ابتسامه كانت محسوبه .. رغم برائة ملامحة ووسامته الا انه ابدع فى انه يقدم دور الشرير فى الفيلم .. يستحق على ادائه 4/5 .. واتوقع له مستقبل حلو اوى فى بوليوود لو كمل ..

#تحليل :
- بداية الفيلم #عاديه .. ظابط جيش راجع فى اجازه عشان يتجوز .. توقعت فى اول وهله انى بتفرج على فيلم مسالا فكسان .. لكن الاحداث بعد كدة بتتطور بشكل تصاعدى لحد ما توصل لاخر الفيلم وانت واقف على صوابعك من القلق ..

- التصوير عجبنى .. المشاهد اللى بتيجى واكشاى بيفكر رائعه .. مشاهد تصوير على فى وكره وهو شغال على القنابل حلوه .. الاضائات مكانتش اوفر .. انما هاديه او خافته .. ملائمه للقصه ..

- الفيلم بيناقش قضيه مهمه اوى .. وهى الارهاب والخلايا اللى ملهاش اسم ولا عنوان .. بيدمروا البلاد بدون هدف وبدون اسباب .. والاخطر من كدة كمان ان بيكون ليهم ناس تسندهم .. ودة خطر كبير اوى ..

- حبيت احترام وتقدير الجيش الهندى فى الفيلم .. لعلمكم الجيش الهندى من اقوى جيوش العالم .. حبيت احترام اكشاى ليهم .. ان دول اللى بيسهروا على حماية البلاد فى حين ان الشعب مش بيعمل حاجة غير انه ينتقده ..

- الاكشن اكثر من رائع .. مفيش طيارات مفيش رفارف .. مفيش اى هرى .. اكشاى فاهم بيعمل ايه .. ولعلمكم اكشاى اتصاب كتير اوى فى تقديم الفيلم .. ورجله مره كانت هتتكسر فى مشهد من مشاهد الاكشن اللى عملها ..

- مدة الفيلم حلوه .. 2:40:44 .. لو شيلنا الاغانى ومشاهد سوناكشى هتاخد قصة الفيلم ومدتها بتاع ساعتين الا ربع مثلا .. يعنى الفيلم اتقدم مستريح .. مكنش محتاج اضافات .. ومفيهوش حاجه محتاجه تتشال ..

- من اكتر الحاجات الكويسه فى الفيلم .. انه للمشاهده العائليه .. اكشاى من الممثلين اللى بتفرج عليهم وانا مأنتخه قدام الـ LCD فى الريسيبشن ومش هاممنى اى حد .. هو وسلمان خان بتفرج على افلامهم قدام الناس عادى جداً   .. اى حد تانى ببقى متوغوشه فى كل مشهد

- الفيلم من اخراج AR Murugadoss وهو مخرج فيلم Ghajini .. واللى متعرفهوش .. ان الفيلم دة كان من المقرر اخراجه فى 2008 مع غاجينى بس اكشاى اجله لانه كان مرتبط بأعمال تانيه لمدة ست سنين قدام .. فاتعمل فى 2014

- الفيلم هو ريميك للفيلم التاميلى Thuppaki لنفس المخرج ... وناس كتير قالت ان الفيلم التاميلى احلى .. بس انا شخصياً مش من متابعين التاميلى ... فامقدرش احكم .. لكن دة مايمنعش ان البوليوودى رائع ..

- تكلف انتاج الفيلم 30 كرور وارباحه كانت 112 كرور .. طبعاً من الافلام اللى دخلت نادى المئه كرور السنادى .. واللى حطمت البوكس اوفيس ..

- الفيلم مكنش اسمه هوليداى فى البدايه ولكن كان اسمه #Pistol وبعد كدة بقي #Bahadur واستقروا فى النهايه على هوليداى ..

#سلبيات :
- مفيش حاجة معينه لفتت انتباهى .. يمكن معجبنيش نفلات المشاهد مع سوناكشى ... يعنى يبقى الفيلم شادد اوى وانت مركز .. وتلاقيك اتنقلت على مشهد كوميدى كأنه من فيلم تانى .. كنت حسه بفرق فى المود بمجرد نقلة المشهد ..

#الموسيقى_الاغانى :
الموسيقى كانت للعملاق Pritam .. يعنى افلام ضخمه زى .. بارفى .. دهوم3 .. يه جوانى هاى ديفانى .. شادى كى سايد ايفكتس .. وقائمه لا تنتهى .. يعنى موسيقى تفرح .. موسيقى لو انت عايز ترقص شغلها .. كانت حلوه اوى .. وتديك امل كدة

كلمات الاغانى كانت لـ Irshad Kamil .. ودة كتب كلمات اغانى ايشقيا 2 وهاى واى وكوكتيل .. كفايا كدة

الالبوم ضم بقي مطربين زى Arijit Singh Official ..

اغانى الالبوم 7 اغانى .. متعرضش منهم فى الفيلم غير 4 بس .. وهما :

Shaayraana : دى الاغنيه التالته اللى اتعرضت فى الالبوم .. وتقريباً اقوى اغنيه فى الفيلم .. وكانت ناعمه او

Tu Hi Toh Hai : دى الاغنيه الاولى و عجبتنى انا شخصياً .. شقيه وناعمه .. موسيقتها حلوه .. وواخده المركز التانى فى الالبوم

Ashq Na Ho : دى اخر اغنيه فى الفيلم .. وكانت مؤثره اوى .. بيقولهم هسيبكم بس انا مجبر .. كانت حلوه اوى   .. وقعدت اعيط وانا بتفرج عليها

Blame The Night : دى الاغنيه التانيه فى الفيلم .. كانت كويسه .. اغنيه ديسكو ..

عرضتلكم الاغانى بحسب مراكزها وترتيبها من الاقوى للأقل فى الالبوم نفسه وحسب تقييمات النقاد ..

تقييم الفيلم فى IMDb
7.4/10
تقييمى
3.5/5

#صالح_للمشاهده_العائليه