علاقات وخلافات بين أميتابتشان وريخا ~ تقارير بوليود وأخبار النجوم

الحقيقه الكامله وراء قصة الحب الملتهبه بين

موناليزا بوليوود والاسطوره

ريخا واميتابتشان ... اسمان يستحيل ان يجتمعا مره اخرى ... بسبب قصة عشق انتهت منذ حوالى 35 سنه ... ولكن لم ينسها التاريخ ... ايه الكلام الكبير دة

ريخا واميتابتشان ... افضل ثنائى عرفته بوليوود فى التاريخ .. وافضل نجمه وقفت قدام اميتاب فى تاريخه كله .. بس كل شئ راح وانقضى

فطرتوا واتبسطتوا .. ركزوا معايا بقى ..

اميتابتشان اتجوز جايا بهادورى .. ومحدش كان عارف سبب جوازه منها ايه .. الا انه زواج تقليدى اخر حاجة .. انما حب .. محدش جاب سيرته وطبعاً الله اعلم بالقلوب ... فككوا من جايا وخلينا مع ريخا

بدأت علاقة الود والحب بينهم فى فيلم Do Anjaane ولكن اللى اثار الموضوع بجد هو الحدث اللى حصل اثناء تصوير فيلم Ganga Ki Saugandh ... لانه زى ماقالت المصادر ان واحد من المساعدين فى التصوير تعدى على ريخا ... واميتابتشان نفخه   ... وهنا الاعلام والصحافه كتب عن ان فى علاقه غرامية بتجمع بين النجمين وكبروا الموضوع اكتر ... وقالوا انهم متجوزين فى السر

اللى شعلل الحكايه اكتر ان فى فرح نيتو سينغ وريشى كابور - عقبال عندكوا - راحت ريخا وهى حطه السيندور ولابسه عقد الزفاف ... فى حركه جريئه جداً .. محدش فاهم هى اقدمت عليها ليه !!!

طبعا جايا ماسكتتش على الكلام دة ... راحت عزمت ريخا على العشا - عشان تقتلها - واتكلمت معاها وقالتلها انها مش هاتسيب اميتاب ابداً وتحت اى ظرف .. - اصيله اصيله الست دى -

طبعاً فى خلال كل دة .. كان اميتابتشان ملتزم الصمت تجاه كل الاشاعات اللى بتطلع ... رغم ان العالم كله عارف انها مش مجرد اشاعات ولكنه التزم الصمت .. بس كان تصريحه الوحيد هو ان ريخا انسانه جريئه جداً ... فى الاعتراف بمشاعرها تجاهه .. وفى اللى عملته فى فرح نيتو وريشى ...

المهم فى عز المعمعه دى قرر ياش راج اخراج فيلم بيتكلم عن القصه دى ... واخرج فيلم Silsila الاسطوره الخالده فى بوليوود ... ويُقال ايضاً ان جايا اصرت ان ريخا تشاركهم فى البطوله وتقوم بدور عشيقة اميتابتشان .. فى محاكاة للواقع ضخمه ..

وتم اخراج فيلم سلسله ... اللى حبت فيه جايا باتشان تقول للعالم كله ... ان مهما كانت قصة حب ريخا واميتاب قويه ... فهى بالنسبالى مجرد فيلم ... وكانت بتتمتع بالقوه والصمود لانها تقبل اخراج فيلم زى دة #مع #العلم ان الفيلم دة اتصور .. فى خضم قصة حبهم وعشقهم لبعض ... وكل الاطراف كانت عارفه كل حاجة ... مش قادره اتخيل ازاى اميتاب صور مشاهده مع جايا .. وازاى ريخا بجرأتها وجبروتها قدرت تقف قدام جايا فى الفيلم وهى بتقولها مش هسيب جوزى ولازم تبعدى عنه ...

اللى شاف فيكم الفيلم هيعرف اد ايه هو قصة ملحميه ... بعد تصوير الفيلم صرح ياش تشوبرا وقال :
"اثناء تصوير الفيلم انا كنت خايف جداً .. فجايا هى الزوجه وريخا هى العشيقه .. والفيلم هو قصه حقيقه بتدور فى الواقع .. وكنت اخشى ان يحدث اى صدام بين الاطراف التلاته "
- وبصراحه حقه -

بعد الفيلم دة بدأت العلاقه بين ريخا واميتاب تتلاشى .. لان ريخا عايزه تتجوزه وهو رافض انه يعيش مع امرآه اخرى ... وبالتالى عرفت ان العلاقه دى ملهاش مستقبل ... وكانت نهايتها على الشاشه هى كمان نهايتها على الواقع ...

فى سنه 1984 بقى صرحت ريخا وقالت :
"لماذا يتعجب الاعلام من انكار حبه لى ... هو يريد ان يحمى بيته ويحمى اسرته ... انا احبه وهو يحبنى هذا كل مافى الامر ... اما هو فعنيد ويريد ان يبقى هذا الحب فى السر .. فأميتاب شخصيه فكرها قديم بعض الشئ .. ولن يستطيع ترك زوجته ... "

بعد سلسله .. تجاهل اميتابتشان ريخا بشكل نهائى حتى فى حفلات الفيلم فير مكنش بيسلم عليها ... لحد مؤخراً بقوا ممكن يؤدوا تحيه لبعض ... فى قصة حب حزينه لم تكتمل ولكن لم ينسها احد ..

المهم بعد كدة اميتابتشان كمل حياته وتقدمه وحافظ على اسرته ... اما ريخا فابتعدت عن الاضواء وعن الناس وبدأت تنهار بشكل تدريجى فنيتو تجوزت ريشى و هيما تجوزت دارمندر ... ملقتش حل غير انها تتجوز بعد كدة موكيش اجروال ... ومخلفوش اطفال .. وهو انتحر شانق نفسه   ... هنا تحطمت ريخا تماماً ومرت بمحنة عصبيه كبيره ... ولكن فى العقد الاخير بدأت تستعيد نفسها ... ومش بتفوت اى حفله او مناسبه بوليووديه ..

ووارى الزمن قصة حب بأنفصال ثنائى عملوا معاً حوالى 20 فيلم ... وكيميا مش هتتكرر .. واسمين .. مش هيتجمعوا تانى